ഇരിങ്ങാലക്കുട സെൻ്റ് ജോസഫ്സ് (ഓട്ടോണമസ്)കോളജിൽ മുൻ അധ്യാപക സംഗമം

തങ്ങളുടെ വിദ്യാർത്ഥിനികളുടെ വിവിധ കലാപ്രകടനങ്ങൾ കണ്ടാസ്വദിച്ച അതേ കോളജ് ഓഡിറ്റോറിയത്തിൽ അവർ ഒരേ വേഷവിധാനത്തോടെ അണിനിരന്നു. പണ്ടത്തെ കാർക്കശ്യവും സ്നേഹവും നിറഞ്ഞ അധ്യാപകരായല്ല, പ്രായം തളർത്താത്ത ചുറുചുറുക്കുള്ള നർത്തകിമാരായി. ഒരേ ചുവടുകളുടെ ലയ ഭംഗിയോടെ അവർ തങ്ങളുടെ കൂട്ടായ്മക്കാലത്തെ സ്നേഹത്തെ വീണ്ടെടുത്തു. ഒരുമിച്ച് കഥകൾ പറഞ്ഞു. അനുഭവങ്ങൾ ഓർത്തെടുത്തു. ഓണസദ്യയും പായസമധുരവുമായി ഇരിങ്ങാലക്കുട സെൻ്റ് ജോസഫ്സ് കോളജിൽ നിന്നു വിരമിച്ച അധ്യാപകരൊന്നു ചേർന്ന സ്നേഹ സംഗമമായിരുന്നു വേദി. ചടങ്ങിൽകോളജ് വൈസ് പ്രിൻസിപ്പൽ ഡോ. സി. അഞ്ജന അദ്ധ്യക്ഷത വഹിച്ചു. റിട്ടയേർഡ് ഫാക്കൽറ്റി ഗ്രൂപ്പ് പ്രസിഡൻ്റ് പ്രൊഫസർ മേരി ആൻ്റിയോ സ്വാഗതം പറഞ്ഞ ചടങ്ങിൽ സെക്രട്ടറി ഡോ. പേളി ഡേവിസ് റിപ്പോർട്ട് അവതരണവും ഡോ. സി. ക്രിസ്റ്റി അക്കൗണ്ട് അവതരണവും നടത്തി. മദർ മേരി പാസ്റ്റർ, പ്രൊഫ. ഫ്രാൻസിസ് പുല്ലൂക്കാരൻ, പ്രൊഫ. ജോസഫ് കോനിക്കര, പ്രൊഫ. വിമല ശങ്കരൻ കുട്ടി, ഡോ. സി. രഞ്ജന തുടങ്ങിയവർ അനുഭവങ്ങൾ പങ്കുവച്ചു. പ്രൊഫ.സാവിത്രി ലക്ഷ്മണൻ നന്ദി പറഞ്ഞു. പുതിയ ഭാരവാഹികളെ ചടങ്ങിൽ തെരഞ്ഞെടുത്തു. വിവിധ കലാപരിപാടികളും അരങ്ങേറി.